Carrasegare trastullu

Cust’annu carrasegare
est benidu antecipadu,
faghen festa in bighinadu
in d’una dom’e amigos,
giovaneddos e antigos
sun preparend’a ballare .

Sas giovanas sun mudadas
cun custumenes famosos,
sos giovanos amorosos
sun bestidos de bassallu
e recuini a su ballu
fiudeddas mascheradas .

Cantas bellas nd’hapo idu
recuidas da-e ogni logu,
cuntentas,intrend’in giogu,
carrigadas de ardore,
dedicadas a s’amore
e sun chirchende maridu .

Sonat bellu s’organittu,
sas feminas sun intentas :
cantas muzeres cuntentas
tenen su maridu in domo
“Tira bella,balla como !
c’a maridu l’has traitu.”

Sun ballende a piaghere,
a brinchittos,a danzadas,
cun carezzas e toccadas
saltiende paren bolos
e sun sos maridos solos
traighinde sa muzere .

Ballana sa notte intrea
sas bellas innamoradas,
gioghitteddos e miradas
rezzin tot’a bonu prou,
incontran s’amante nou,
mudan subitu s’idea

e sunis tot’a sumbullu:
mascheradas,mascherados :
sunis totu mischiados
amorazzende in segrettu,
nde cumbinat de ogni ettu,
carrasegare trastullu .-

Pera Austinu Sanna Migone--Austis, Carrasegare 1950